Fugletur til Østensjøvannet
Vi i LT må berre beklage at vi ikkje har betre kontakt med værgudane! Fire - fem grader og ein iskald trekk langs dei opne strekka ved vatnet innbaud ikkje mykje til fuglesang.. . Men vi la nå i veg: seks damer med høgst ulik fuglekikkebakgrunn, samt hunden Maja. Med oss hadde vi også ein journalist frå Blikk, som skulle lage ein reportasje om oss i anledning LTs tiårs jubileum.
Vi starta frå p-plassen i søraustenden av Østensjøvannet, og bevega oss mot brua i sørenden av vatnet. Der fann vi mengder med hettemåker, nokre duer, toppendar og gjess, og dessutan eit sothønepar med to ungar. Sothøna er ein flott fugl med sotsvart kropp og elegant kvitt nebb med panneplate. Ungane deira derimot, var ikkje vår herre like nådig mot - den gongen han bestemde korleis dei skulle sjå ut. Sothøneungane er dønn skalla, har knall raude hovud og med oransje fjærfjoner nedover halsen. Etter dette oppmuntrande synet fortsatte vi langs austbreidda forbi utløpet til Bølerbekken.
Turens høgdepunkt kom tidleg. "Hva er det for en fugl?" sa Inger, og satte teleskopet resolutt i bakken, peikande ut mot ei treklynge på ei av dei små øyene rett ut frå land. Ein kjapp titt i teleskopet syner ein spurvefugl med raudt bryst og svart halstørkle. Raudstjert viste det seg å vera - sannsynlegvis berre på gjennomfart, på veg opp mot fjella. Ingen kjempesjeldan fugl, men ikkje vanleg heller, og i alle tilfelle svært vakker!
Det kalde været innbaud ikkje til fuglesang, men litt avspelling av sivspurv-sang frå mobilen fekk lokka ein litt motvillig sivspurvhann opp i ein busk. Etter å ha kasta eit par blikk i vår retning, samt kvitra eit par strofer forsvann han ned att i sivet. Forhåpentlegvis var det meir ly og varme der.
Vi runda nordenden av vatnet, og fortsatte inn i skogen på stien over Tallberget. Og trass i været høyrde vi sangen til både lauvsangar, gransangar, svarttrost, gjerdesmett, bokfink, raudstrupe og muligens munk.
Alle håpa å få eit glimt av rustanda eller i det minste komma nær innpå nokre av krikkendene, som turleiar hadde sett to dagar før. Men rustanda glimra med fråværet sitt, og krikkendene såg vi berre langt i det fjerne, før dei alle tok til vingane og forsvann.
Men turen var fin den, turfølget utmerkt og vi fekk sett mykje fugl på vatnet. Så alt i alt var det ein fin tur, om enn litt kald!
Vi såg eller høyrde bla. desse fuglane: knoppsvane, kanadagås, grågås, stokkand, toppand, kvinand, krikkand,toppdykkar, sivhøne, sothøne, hettemåke, kråke, skjære, svarttrost, gråtrost, kjøttmeis, blåmeis, bokfink, lauvsangar, gransangar, gjerdesmett, munk, raudstrupe, sivspurv, buskskvett, raudstjert.
Dei som var med: Nina, Inger, Betzy, Maja, Silje, Anne Marie, Rine (turleder)
For fyrste gong i LT's historie: videosamandrag av turen - laga av Nina Didriksen! Enjoy!
Bildegalleri
Klikk på et bilde for å forstørre. Bruk piltaster eller trykk i høyre/venstre del av bildet for å få opp hhv neste eller forrige bilde.
Facebook
Twitter